Алаңдардың тіркелуі елде реттелетін деректер нарығы қалыптаса бастағанын көрсетеді. Платформалар электрондық лицензиялау ақпараттық жүйесі арқылы хабарлама тәртібімен жұмысын бастай алады.
MedHub медициналық деректердің жеке басын анықтауға мүмкіндік бермейтін нұсқасын қауіпсіз алмасуға арналған. Алаң денсаулық сақтау саласындағы ғылыми зерттеулерге, талдауға және цифрлық шешімдерді әзірлеуге бағытталған.
Astana Data Exchange цифрлық деректер өнімдерін орналастыруға, іздеуге, алмасуға және коммерцияландыруға мүмкіндік береді. Kompra контрагенттерді тексеру, тәуекелдерді бағалау және басқарушылық шешімдер қабылдау үшін осындай өнімдерді пайдаланады.
Платформалардың иелері дербес деректер туралы заңнаманы және киберқауіпсіздік талаптарын сақтауға міндетті. Деректер өнімдері өңделген, құрылымдалған, сапа талаптарына сәйкес келуі және адамды сәйкестендіруге мүмкіндік беретін мәліметтерді қамтымауы тиіс.
Мақсат Тұрлыбаевтың айтуынша, платформалардың дамуы бизнеске цифрлық деректерді заңды түрде пайдалануға және коммерцияландыруға, ал мемлекетке жасанды интеллектті енгізуді жеделдетуге және цифрлық қызметтердің тиімділігін арттыруға көмектеседі. Цифрлық кодекс 2026 жылғы 12 шілдеде күшіне енді.